Desidido nga magpasaka sang kaso ang pamilya sang napatay nga 23 anyos nga engineering graduate matapos ginlasak sang truck ang tricycle nga iya ginasakyan sa Circumferential Rd., Barangay Alijis, Bacolod City tinalikdan nga Disyembre 22 sang gab-i kun magapasaka sila sang kaso batok sa driver sang salakyan nga una nga nagsagaid sa tricycle.
Madumduman nga halin sa training si Prince Relatos kag pauli na kuntani sakay sa gin-arkilahan nga tricycle sang gindalasa ini sang salakyan gani naglabog ang tricycle.
Nagasunod ang truck nga may karga nga tubo gani nalasakan sini ang tricycle kun sa diin gilayon nga ginbawian sang kabuhi si Relatos.
Sa interview sang Bombo Radyo Bacolod kay Edna Relatos, iloy sang 23 anyos nga biktima nga engineering graduate, ginpahibalo sila sang imbestigador sang Bacolod City Police Station 7 nga nagsungka na ang suspetsado nga si Ian Roy Hullaca, 40-anyos kag residente sang Barangay Handumanan nga driver sang Toyota Innova nga nagaduag pula kag responsable sa pagbunggo sa ginasakyan nga tricycle ni Relatos.
Gin-interview man sini ang suspetsado kag gintuad man sini nga wala siya kabalo nga may nabungguan ini.
Suno sa iloy nga Relatos kilala sini ang iloy sang suspetsado bangud suki nila ini sa furniture shop sa Handumanan.
Nalipong naman ang iloy ni Halluca sang nakabalo ini nga nabungguan sang anak niya ang biktima kag napatay.
Nanindugan man ang iloy sang biktima nga kun wala sang plano nga magpalagyo si Hullaca wala sini ginpakay-o ang iya salakyan.
Ginpanugyanan man ang pamilya ni Relatos nga tapuson lang ang lubong sang biktima kag magpasaka sang kaso batok sa suspetsado.
Nahibaluan nga gin-amat-amat na pakay-o ni Hullaca ang iya salakyan apang ginpahalin man sang ginpakay-uhan nga talyer bangud nahibaluan nga siya ang posible nga suspect sa pagkabunggo nga ginkamatay sang biktima.
Una naman nga ginpahayag ni Police Lt. Conrado Espino, hepe sang Police Station 7, nga ginhambalan si Halluca sang iya himata nga police nga magsungka nalang sa otoridad.
