Gina-abi-abi sang secretary general sang General Alliance of Workers Association (GAWA) bilang welcome development ang pagpaiway anay sang nakaschedule nga pagsaka sang contribution rate sa Philippine Health Insurance Corporations (Philhealth) para sa mga miyembro.
Sa public briefing nga ginpatigayon kagab-i, ginpahayag ni Duterte kay Philhealth chief Dante Gierran nga isuspende anay ang pagpasaka sang monthly premium karun nga may COVID-19 pandemic.
Madumduman nga sa idalom sang Universal Health Care law, ginamando ang pagpasaka sang PhilHealth contributions kada tuig sugod sang 2020 kun sa diin dapat makalab-ot ini sa 5% sang monthly income sa tuig 2025 agud nga mapasiguro ang long-term actuarial sustainability sang system.
Sa interview sang Bombo Radyo Bacolod kay GAWA secretary general Wennie Sancho, ginpahayag sini nga makagulu-ginhawa na diutay ang mga mamumugon bangud sa temporaryo nga pagpaiway sang contribution hike sa Philhealth ilabi na subong nga may ginapangatubang nga pandemic kag economic crisis.
Suno sa iya, makapiyan-piyan ang pagsuspinder sini bangud 20 tubtob 25% na nga daan sang sweldo sang mga mamumugon ang ginbuhin dala sang pandemic.
Nagapati man ini nga dapat gid man pasakaan ang kontribusyon sang ahensya apang dapat I-address anay ang isyu sang korapsyon kag mapaathag sang husto kun sa diin nagakadto ang pondo.
Nagalaom man si Sancho nga pati ang contribution hike sa SSS ang madefer man agud malubos-lubos ang kalipay sang mga mamumugon sini nga 2021.
