Gin-athag sang Quick Response Team Leader sang Pantawid Office sa ciudad sang Bacolod nga ang mga driver lang nga wala nakabaton sang Social Amelioration Program (SAP) sang local government unit (LGU) kag indi benepisyaro sang Pantawid Pamilyang Pilipino Program (4Ps) ang kwalipikado nga makabaton sang SAP sa idalom sang Land Transportation Franchising and Regulatory Board (LFTRB).
Kaina sang aga, nagpadulong ang mga PUJ drivers kag taxi drivers sa Pantawid Office agud kuntani magkuha sang ila nga beneficiary reference number (BRN) agud ma-claim ang ayuda sa Mlhuiller.
Sa interview sang Bombo Radyo kay Joelito Villarias, isa ka PUJ driver, ginpahayag sini nga may yara sang nagpahibalo sa ila nga may tagtaganay subong sang ayuda para sa mga driver nagikan sa LTFRB gani nga nagpadulong sila sa Pantawid Office agud nga kumpirmahon ini.
Suno sa iya, wala sang husto nga impormasyon nga ginpadangat sa ila nga ang mga wala lang nakabaton sang LGU SAP kag indi 4Ps beneficiaries ang makabaton sang P6,500 nga ayuda.
Suno naman kay Ryan Cesar, quick response team leader sang Pantawid Office, may yara sang 2,700 ka mga drivers ang yara sa listahan nagikan sa LTFRB apang ila ini gincrossmatching kun diin 600 ka mga drivers ang na-disqualify matapos mahibaluan nga nakabaton na sila sang LGU SAP kag 4Ps beneficiaries ang iban.
Suno sa iya, tatlo ka adlaw ang ila gintalana nga schedule sa pagrelease sang BRN sa mga qualified drivers.
Ang mga kwalipikado nga driver nagikan sa numbered barangays ang natalana nga magkuha sang ila nga BRN sa Pantawid Office subong nga adlaw.
Sini man nga hapon ang schedule sang taga-Barangay Sum-ag, Punta Taytay, Pahanocoy kag Tangub nga iga-release sa Sum-ag Gym.
Samtang, bwas, Enero 6, ang mga driver nagikan sa Barangay Handumanan, Felisa kag Cabug ang natalana nga magkuha sang ila BRN sa Handumanan Gym.
Sa Mansilingan Gym naman magapadulong bwas ang mga taga-Barangay Mansilingan, Vista Alegre kag Taculing.
Sa Granada gym man bwas igarelease ang BRN sang mga kwalipikado nga drivers nagikan sa Barangay Montevista, Granada, Alangilan, Estefania kag Villamonte.
Bwas man natalana ang releasing sang BRN para sa mga taga-Barangay Banago sa ila nga barangay hall.
Sa Enero 7 naman naka-schedule ang Barangay Alijis sa Alijis Gym.
Sa Huwebes man natalana ang tagtaganay sang BRN para sa mga taga Barangay Singcang Airport sa ila nga barangay hall.
Kag sa Enero 7 man makakuha sang BRN sa Bata Gym ang mga taga-Barangay Bata kag Mandalagan.
