Ginpirmahan na ni Mayor Evelio “Bing” Leonardia ang multi-lateral agreement kag confidentiality agreement sa tunga sang AstraZeneca Pharmaceutical, National Inter-Agency Task Force, Department of Health kag City Government sang Bacolod natuhoy sa availment sang bakuna batok sa COVID-19 sa Bacolod City Government Center kahapon sang hapon.
Suno kay Leonardia, mangin kabahin man ang ciudad sa mga local government unit nga magatambong kag magaperma sang Memorandum of Agreement sa Sabado agud maka-acquire sang bakuna nagikan sa AstraZeneca.
Suno sa iya, dako na nga bagay nga mangin prayoridad ang ciudad sa mga mahatagan sang COVID vaccine.
Gin-athag naman ni Bacolod City Administrator Em Ang nga ang profiling kag identification sang COVID-Vaccine Council nahanungod sa mga sektor nga himuon prayoridad ang magadepende gihapon sa pagsulundan sang Department of Health kag National Inter-Agency Task Force.
Suno kay Ang, una diri ang mga frontline health workers, ikaduha ang mga vulnerable sectors kag senior citizens kag ini ang pagasundan sang mga katapos sang Philippine National Police, mga manunudlo kag iban pa nga sektor.
Sa karun may yara sang siyam ka mga commitees ang COVAC Council nga ginalakipan sang profiling, acquisition, adminsitration, vaccination centers, storage, transport, mobilization, funding kag information.
Suno sa iya, may yara sang tagsa-tagsa ka mga pinuno ang kada komitiba kag sa karun nagasugod na sila sa pagroll out sang mga plano kag stratehiya.
