Patay ang 25 anyos nga lalaki matapos nga ginluthang sang iya mismo nga pakaisa sa Barangay Dolez, Calatrava, Negros Occidental sang Miyerkules.
Suno kay P/Maj. Robert Indiape, hepe sang Calatrava Municipal Police Station, ang biktima ang ginkilala kay Mario Mahinay, 25 anyos kag ang suspetsado amo ang iya nga pakaisa nga si Jeniffer Bargamento, 24 anyos kag lunsay mga residente sa lugar.
Suno kay Indiape, kaupod sang biktima ang iban pa sini nga mga pakaisa sang hinali nalang nga nagkadto sa likod ni Mahinay ang suspetsado kag gintiro ini sa tangkugo.
Gindala pa sa balay bululngan ang suspetsado apang gindeklarar nga dead on arrival.
Ginlagas naman sang mga himata sini ang suspetsado apang gilayon nga nakapalagyo kag wala nadakpan tubtub subong.
Ginalantaw nga motibo sa krimen amo ang dumot sa iya nga pakaisa.
Sang tinalikdan nga semana, naaktuhan sang biktima nga nagasabtanay ang suspetsado kag ang iloy sini.
Ginasaway sang iloy si Bargamento apang nagasabat-sabat ini sa iloy gani ginsaway sang biktima nga indi magsabat sa iloy.
Ginalantaw sang kapulisan nga nagdumot ang suspetsado kag iya ginhimo ang krimen.
Ginapanugyan naman ni Indiape sa mga himata sang suspetsado kasubong man diri nga mas maayo nga magsungka ini kag atubangon ang sala.
