Tul-an na sang nasapwan ang isa ka 78-anyos nga lalaki sa kampo sang Hacienda Olympia, Barangay Binubuhan, Bago City kahapon sang udto matapos ang malapit duha ka bulan nga ini ang namissing.
Sa interview sang Bombo Radyo kay Jun Luping, bata sang biktima nga ginkilala kay Rodolfo Luping, 78 anyos kag residente sang Bago City, Nobyembre 15 sang wala na makapauli ang iya amay.
Suno kay Luping, kahapon, ginpatawag sila sang mga manugtapas sa kampo bangud nasapwan ini duha ka kilometros ang kalayuon sa ila puluy-an kag apisar nga tul-an nalang, ila nakumpirmar ang iya identity bangud sa iya panapton.
Suno diri, santo sa findings sang imbestigador, wala sang damage sa lawas sang biktima kag wala man sang foul play.
Isa ka anggulo nga ila ginalantaw amo ang posible nga natrap sa kampo kag nasup-ay ang iya amay bangud tigulang na ini.
Suno sa iya, nahim-us ang ila tagipusuon bangud ila na gid man nakit-an ang amay apang masakit gihapon bangud ini ang iya kahimtangan.
Temporaryo ini nga gindala sa ila puluy-an antes ginbutang sa punerarya.
