Ginpaidalom sa state of calamity ang ciudad sang Talisay kasunod sang halit sang baha nga nagluntad sang Enero 1 sang kaagahon.
Sa interview sang Bombo Radyo kay Geoffrey Gutierrez, pinuno sang Talisay City Disaster Risk Reduction and Management Office, nagpasar ang CDRRMC sang resolusyon sang Lunes nga nagarekomendar sa alkalde nga ipaidalom ang ciudad sa state of calamity.
Sa session sang Sangguniang Panlungsod sang Miyerkules, ila nga gin-aprubahan ang deklarasyon sang state of calamity bangud sa halit sang baha.
Nagadangat sa 4, 465 ka mga pamilya sa 17 ka mga barangay sa Talisay ang apektado sang baha.
Suno kay Gutierrez, may batunon nga bulig pinansyal ang mga pamilya nga nagub-an sang balay kag ini ang pagakuhaon sa calamity fund sang ciudad.
Halin sang Enero 1, nagpanagtag man ang city government sang food packs kag ini ang magapadayon sa sulod sang duha ka semana.
Sa Sabado, suguran na ang dredging sang Catabla River kag Minuluan River sa ciudad sang Talisay agud nga ini ang magdalom.
Suno kay Gutierrez, mapahulam ang provincial government sang dredger.
Nagpanugyan man ini sa mga residente nga nagaistar sa higad sang suba nga magsaylo nalang sang ilistaran kun may yara sang sarang nga sayluhan bangud desidido ang city government nga patigayunon ang clearing operations sa higad sang suba.
Ginpasalig man sini nga mangita sila sang relocation site para sa apektado nga mga residente.
