Nagapati si Bacolod City Councilor Renecito Novero nga maaprubahan sang Sangguniang Panlungsod ang ginapangayo ni Mayor Evelio “Bing” Leonardia nga emergency authority nga magnegosyar sa iban nga mga supplier sang COVID-19 vaccine.
Madumduman nga ginpermahan ni Leonardia ang multi-lateral agreement kag confidentiality agreement sa tunga sang AstraZeneca Pharmaceutical, National Inter-Agency Task Force, Department of Health kag City Government sang Bacolod natuhoy sa availment sang bakuna batok sa COVID-19 sa Bacolod City Government Center kahapon sang hapon.
Sa interview sang Bombo Radyo Bacolod kay Novero, pinuno sang Vaccination Center Action Team, ginpahayag sini nga talakayon nila sa session subong nga hapon ang hingyo sang alkalde angot sa paghatag sa iya sang emergency authority nga magnegosyar kag magpangita sang iban nga mga supplier sang bakuna batok sa coronavirus.
Gin-athag sang konsehal nga ang city government ang indi lamang eksklusibo sa AstraZeneca Pharmaceutical.
Suno kay Novero, wala pa nahibaluan kun pila ka volume sang bakuna ang sarang mahatag sang amo nga kompaniya.
Apang iya naman ginkumpirmar nga nagpain na sang P300 million nga initial amount ang city government para sa bakuna.
Dugang pa ni Novero nga handa man ang ciudad nga irealign ang pondo sa idalom sang 2021 budget para maka-avail sang bakuna para sa proteksyon kag kaluwasan sang mga pumuluyo.
