Masobra isa ka semana ang nakaligad matapos magluntad ang lapnagon nga pagbaha sa Northern Negros Occidental, liwat naman nagsaka ang tubig kagab-i tubtob kaina sang kaagahon bangud sa ulan dala sang low pressure area.
Sa interview sang Bombo Radyo kay Provincial Disaster Risk Reduction Management Office head Dr. Zeaphard Gerhart Caelian, nagdangat sa 1089 ka pamilya ang gin-evacuate sa syudad sang Victorias santo sa inisyal report nga ginpagwa alas 02:33 kaina sang kaagahon.
Samtang, ginrescue man sang mga otoridad kag City Disaster Risk Reduction Management Team sang Talisay City ang duha ka pamilya ukon napulo ka indibidwal sang Barangay Zone 4A; 21 naman ka pamilya ukon 48 indibidwal sa Barangay Zone 12.
Samtang lima ka pamilya ukon 14 ka mga persona ang gindala sa South Elementary School kag 45 ka pamilya sang Barangay Zone 3 ang ginevacuate.
Sa Barangay Zone 2 sang nasambit nga syudad ang 100 ka pamilya samtang pito naman ka pamilya sang Barangay Zone 16 ang gindala sa Barangay Chapel kag 55 ka pamilya man ang evacuate nagikan sa Barangay Bubog Talisay City.
Ini ang pinakaulihi nga data nga ginpagwa alas 12:00 kaina sang kaagahon sang Talisay City Government.
Samtang, ginbaha man ang Barangay E. Lopez; Barangay Rizal; Barangay Kapitan Ramon; Barangay Balaring; kag Barangay Lantad Silay City, Negros Occidental.
Nalakip man sa ginbaha ang banwa sang EB Magalona, Victorias City kag Sagay City samtang ginahulat pa ang report sang DRRMO team sang Cadiz kun may yara sang ginbaha sa nasambit nga syudad.
Una naman nga ginpanugyan sang pinuno sang Provincial Disaster Risk Reduction Management Office ang pre-emtive evacuation sa mga apektado nga lugar.
Sa karun wala pa sang nareport nga nasamaran, missing kag casualty bangud sa pagbaha.
