Gin-aprubahan na sang Sangguniang Panlungsod sang syudad sang Bacolod ang paghatag liwat sang otoridad sa alkalde agud magnegosyar sa iban pa nga mga pharmacy company para sa COVID-19 vaccine.
Sa interview sang Bombo Radyo Bacolod kay Vice Mayor El Cid Familiaran, wala man nakabutang sa agreement sang syudad kag sa Astrazeneca nga exclusive sang ila nga magkuha sang vaccine.
Suno kay Familiaran, wala mahibaluan kun pila ka vials ang makuha sang Bacolod City nga Covid vaccine nagikan sa Astrazeneca bangud 2.6 million vaccine lang ang mahimo mabaligya sa bilog sa Pilipinas.
Suno sa bise alkalde, bug-os nga kalibutan ang nagasalig sa Covid vaccine.
Suno pa diri, may yara sang 12 ka mga kompanya nga nagahimo sang vaccine apang ang Astrazeneca ang una nga naaprubahan sang Food and Drug Authority (FDA).
May yara naman sang initial funding nga gin-aprubahan ang SP para sa mga Covid vaccine.
Ginpahayag man sini nga ang mahimo hatagan sang vaccine ang nagaedad 18 anyos pasaka.
Suno pa kay Familiaran, voluntaryo man ang pagpabakuna.
Nagpanindugan man si Familiaran nga wala sang dapat kahadlukan ang mga pumuluyo sa vaccine kag ginakabig niya man ang mga nagalapta sa social media nga madamo side effects ang vaccine bangud minilyon naman ang nakapabakuna kag pila lamang ang nagapalapta nga may side effect.
Suno kay Familiaran, sa tion nga may vaccine na magapabilin sa gihapon ang pagsuksok sang facemask kadungan sang pagbalik sa new normal.
Nahibaluan nga may yara na sang P300 million nga ginpain ang syudad para sa vaccine.
Ginpasalamatan man ni Familiaran ang mga kompanya kaangay sang chairman sang Bombo Radyo Philippines Dr. Rogelio M. Florete nga nauna na naghatag pahayag nga sabton sini ang pagbakal sang vaccine para sa iya empleyado sa bilog nga Pilipinas.
