Gina-evaluate na karon sang Department of Social Welfare and Development (DSWD)-Negros Occidental ang halit nga gintuga sang pagbaha sa Northern Negros kag ang nagkalain-lain nga kinahanglanon sang mga apektado nga local government units (LGUs).
Nahibaluan nga apektado sang tubig-baha amo ang Talisa City, Silay City, EB Magalona, Victorias City, Sagay City, Cadiz City, Escalante City kag banwa sang Toboso bangud sa wala-untat nga pagbahaa halin kahapon tubtob kaina sang aga nga ginsugata naman sang hightide.
Sa interview sang Bombo Radyo Bacolod kay Governor Eugenio Jose “Bong” Lacson, ginpahayag sini nga iya na ginapatumod sa DSWD ang mga kinahanglanon sang kada LGU.
Ginpasalig man sini nga magahatag sang ayuda ang provincial government sa mga apektado nga LGUs kaangay sa ginhimo sang nagligad nga pagbaha sadtong Enero 1.
Gina-engganyo man ni Lacson ang mga LGUs ilabi na sa 3rd District nga magbakal sang kaugalingon nila nga dredger.
Suno sa iya, dapat nagapadayon nga operasyon ang dredging agud marevive ang natural waterways.
Madumduman nga kahapon nagtambong si Lacson upod si Office of the Civil Defense (OCD) Region 6 director Roberto Nuñez kag iban pa nga mga opisyales sang launching sang Maintenance Dredging Program sang Department of Public Works and Highways (DPWH) nga ginhiwat sa Carugiat River.
