Indi makapati ang mga barangay officials sa northern Negros Occidental sa nagluntad nga pagbaha humalin kagab-i tubtob kaina sang aga.
Nag-antos ang mga motorista sa magutok nga dalagan sang trapiko sa Barangay San Jose, EB Magalona matapos maglapaw ang tubig sa national highway.
Kinahanglan pa nga magbayluhanay ang duha ka lane sa pagtabok sa Tiniyaban Bridge bangud sa kataason sang tubig kun sa diin na-delay ang biyahe sang mga motorista halin kag padulong sa Bacolod.
Sa interview sang Bombo Radyo Bacolod kay Punong Barangay Willie Guilaran, naglapaw ang Malugo River kag Malisbog River gani ang ila barangay ang nagaserbe nga catchbasin sang tubig.
Suno kay Guilaran, 80 porsyento sang masobra 3,000 ka mga panimalay sa Barangay San Jose ang apektado sang pagbaha.
Wala naman ginalauman sang mga residente nga malapawan sang baha kaina sang kaagahon ang kadalumon sang tubig-baha nga ila naagyan isa ka semana na ang nakaligad.
Magluwas sa Barangay San Jose, ginbaha man ang Barangays Tanza, Sto. Niño kag Barangay Latasan, EB Magalona kadungan sang pagsugataay sang tubig nagikan sa suba kag hightide.
