Kabug-usan nga siyam ka mga taytay ang naguba sa ciudad sang Silay kadungan sang pagbaha sini nga bulan.
Sa interview sang Bomo Radyo kay Silay City Mayor Mark Golez, nagahumok ang duta bangud sa tayuyon nga pagtupa sang ulan.
Nagadangat sa 9, 015 ka mga pamilya ukon 28, 785 individuals ang apektado sang pagbaha apang 813 lang ang nag-evacuate sa evacuation centers samtang 8, 202 ang wala nag-evacuate bangud nahubas man gilayon ang baha.
May mga balay naman nga naguba sa Barangay Hawaiian, Bagtic, E. Lopez, Lantad, Rizal kag Barangay Balaring samtang 185 naman ka mga balay ang partially damaged.
Sa karon indi malabayan ang taytay sa Hacienda Mariano sa Barangay Bagtic, naguba man ang yara sa Hacienda Bagatay samtang halos indi naman malabayan ang taytay sa Barangay Guimbalaon bangud sa landslide.
Aminado naman si Golez nga nagsaka ang tubig bangud sa pagsugat-anay sang tubig nagikan sa suba kag taob.
Magasapol naman ang Silay City Disaster Risk Reduction and Management Council agud hambalan ang natuhoy sa halit sang baha.
