Ginpanginwala sang pinuno sang Provincial Environment and Natural Resources Office (PENRO) nga may yara sang nagaluntad nga illegal cutting ukon illegal logging sa Northern Negros Natural Park.
Sa interview sang Bombo Radyo Bacolod kay PENRO head Edgardo Rostata, ginpanindugan sini nga wala sang may nagakatabo nga illegal logging sa NNNP bangud nga indi dali-dali makasulod sa area kun wala sang permit.
Dugang pa ni Rostata nga nagahatag gid sang pondo ang mga local government units (LGUs) nga nasakupan sang NNNP para sa Bantay Gubat.
Suno sa PENRO head, ang tanan nga mga development kag proyekto sa NNNP ang naga-agi gid sa protected area manaagement board bangud sila ang naga-evaluate kag nagahatag sang clearance.
Suno kay Rostata, samtang naga-income ang protected areas, dapat indi ini makahalit sa palibot.
Ang mga gina-award nga duta sang gobyerno sa mga negosyante ang makabig na nga tenured areas kag indi na kabahin sang strict protection zone.
Paathag pa sini nga ang mga structures sa NNNP ang may yara sang integrated social forestry project kun sa diin nga may yara sila sang responsibilidad nga kun pila ka porsyento sa gin-award nga duta sa ila ang dapat tamnan man nila sang kahoy.
