Ginpanindugan sang pinuno sang inter-agency task force against COVID-19 sa ciudad sang Bacolod nga mas kululbaan ang coronavirus sangsa pagpatublok sang bakuna batok sa virus.
Madumduman nga ginpirmahan na ni Mayor Evelio �Bing� Leonardia ang multi-lateral agreement kag confidentiality agreement sa tunga sang AstraZeneca Pharmaceutical, National Inter-Agency Task Force, Department of Health kag City Government sang Bacolod natuhoy sa availment sang bakuna batok sa COVID-19 nga may pondo nga P300 million.
Sa interview sang Bombo Radyo kay Bacolod City Vice Mayor El Cid Familiaran, ginpahayag sini nga dapat pasanyugon gid ang information drive campaign nahanungod sa COVID vaccine bangud nga madamo sa gihapon subong ang nahadlukan magpabakuna bangud sa natabo sa dengvaxia vaccine.
Suno kay Familiaran, dapat ang City Health Office ang maga-initiate sang information drive campaign agud mag-edukar sa publiko kun ano ka importante ang magpabakuna batok sa coronavirus.
Suno sa bise alkalde, sa pagkamatuod, ulihi na ang Pilipinas ka tama bangud nga nagasugod na ang iban nga pungsod sa ila nga vaccination.
Samtang, iya man ginhatagan pagtamod nga madamo sang dapat ikonsiderar sa pagbakal sang bakuna ilabi pa nga ang mga kabataan nga naga-edad 18-anyos panubo ang indi kwalipikado nga magpabakuna.
Suno kay Familiaran, dapat nga hibaluon gid sang city government kun pila kabilog ang pumuluyo sini nga bakunahan bangud nga may yara man sang iban nga dalagko nga kompaniya kaangay sang Bombo Radyo nga ang employer ang maga-shoulder sang bakuna sang mga empleyado.
Suno sa iya, indi pwede nga magpalagpat lang sa baklon nga volume sang vaccine bangud may yara ini sang expiration.
