Ginakasubo sang konseho sang Barangay 10, Bacolod City ang pagtaliwan ni Punong Barangay Dexter Yap sang Domingo, sa edad nga 59 bangud sa cardiac arrest.
Sa interview sang Bombo Radyo kay Number One Kagawad Melvin Bravo, ginpahayag sini nga sang tinalikdan nga Sabado, mapagsik kag maayo pa ang pamatyagan ni Yap sa ila ginpatigayon nga session.
Suno sa iya, nagasuprer ini sang diabetes apang padayon man ang iya pag-inom sang bulong kag mabaskog man ini kada adlaw.
Suno kay Bravo, sang Domingo gindala ini sa ospital kun sa diin gincardiac arrest ini pagkagab-i santo sa pahayag sang pamilya.
Suno sa iya, kahapon sang aga lang sila nakahibalo kag ginakasubo gid sang konseho ang pagtaliwan sang punong barangay.
Suno diri, isa ka maayo nga pinuno si Yap, may panindugan kag respetado ang pamilya sini.
Dako man ang nabulig sini sa development sang ila barangay.
Nagpasalig man si Bravo nga kun ano ang italana sang Department of the Interior and Local Government, iya ini batunon bilang number one kagawad kag kun ano ang naumpisahan ni Yap ang ila padayunon.
