Nagsapol kahapon ang provincial incident management team agud hambalan ang nagluntad nga pagbaha sa Northern Negros sang tinalikdan nga Enero 8.
Sa interview sang Bombo Radyo Bacolod kay Provincial Disaster Management Program Division head Dr. Zeaphard Gerhart Caelian, ginpahayag sini nga madamo sila sang gintalakay kahapon upod si Negros Occidental Governor Eugenio Jose “Bong” Lacson.
Suno kay Caelian, gintsekyar kahapon ni Lacson ang status sang dredging equipment sang probinsya.
Ila man gin-istoryahan ang paghatag sang ayuda sang provincial government kaupod ang Department of Social Welfare and Development.
Gintalakay man ang mga masunod nga proyekto kag plano agud ma-mitigate ang pagsaka sang tubig sa tion nga magsige-sige ang ulan kag hightide.
Sa pinakaulihi nga data naman nga nalikom ni Caelian, nagadangat sa 55 ka mga barangay tanan ang apektado sang pagbaha nga ginalakipan sang 9,191 households ukon 45,567 individuals.
4,487 ka mga pamilya ukon 21,984 ka mga indibidwal ang nagtinir sa evacuation center.
76 ka mga balay naman ang narekord nga totally-damaged samtang 400 naman ang partially-damaged bangud sa pagbaha.
Dugang pa ni Caelian nga isa ang nangin casualty bangud sa pagbaha kag ini ang 43-anyos nga lalaki nga napatay sa San Herman, Barangay Guimbala-on, Silay City matapos narumpag ang iya balay.
390 DSWD foodpacks ukon nagabalor sang 206 mil pesos na ang napanghatag sang probinsya samtang P787,300 naman ang nangin bulig sang mga LGU nga may total amount nga P994,000.
Padayon naman nga gina-assess pa ang nangin halit sa imprastraktura.
Samtang, ginkumpirmar naman ni Caelian nga nagaserbe man bilang commander sang provincial incident management team nga nagaplano ang provincial government nga magpakighinun-anon sa Negros Oriental sa posible nga pagbukas sang border.
Suno sa iya, gina-assess pa nila kun pila ang active cases sang duha ka mga probinsya kag kun mangin safe ang duha ka mga lugar kun magbukas ang border.
Apang magakonsulta anay ang gobernador suno kay Caelian sa mga local chief executives subong man sa Dumaguete City kag Bacolod City.
