Ginahulat pa sang pinuno sang COVID Vaccination Center Team sa ciudad sang Bacolod ang approval ni Mayor Evelio “Bing” Leonardia angot sa ila ginarekomendar nga 22 ka mga vaccination centers para sa ciudad.
Sa interview sang Bombo Radyo Bacolod kay Councilor Renecito Novero, pinuno sang COVID Vaccination Center Team, ginpahayag sini nga naka-identify na sila sang 22 ka mga vaccination sites sa tion nga mangin available na ang bakuna batok sa COVID-19.
Ini ang nangin resulta sang ginpatigayon nila nga pagsinapol sang iya nga team bilang pagpanghanda sa palaabuton nga vaccination sa Bacolod.
Una na sini nga ginpahayag nga ila ginasuhestyon nga dapat tanan nga mga vaccination centers ang may yara sang freezer para sa storage sang bakuna kag may generator sa tion nga magbrown out.
Suno kay Novero, natalana sila liwat nga magpatigayon sang meeting upod ang iya nga team agud nga ifinalize ang ila nga plano.
