Padayon pa ang hot pursuit operation sang 79th Infantry Battalion sang Philippine Army matapos nga naka-palagyo ang mga gina-patihan miyembro sang New People’s Army sa Hacienda Ambulong, Barangay San Fernando, Talisay City.
Sa interview sang Bombo Radyo kay Lt. Norman Sorila, officer sang 79th Infantry Battalion, nakabaton sila sang impormasyon nga may yara sang presensya sang NPA sa amo nga lugar kun sa diin positibo sa ila gin-patigayon nga imbestigasyon.
Suno sa iya, pasado alas-2:00 kaina sang kaagahon sang gin-padulongan nila ang lugar, kag base sa ila pag-pangusisa, gin-ako sang isa ka sibilyan nga may yara sang presensya sang NPA sa amo nga hacienda.
Ginpahayag man ni Sorila nga ang nasambit nga sibilyan nga wala na nila gin-hingadlan amo ang tag-iya sang balay nga gin-istaran sang mga NPA.
Apang suno kay Sorila, posible nga nahibaluan sang makawala nga grupo nga iga-operate sila rason nga gilayon sila nagbiya sa lugar.
Ginbilin man sang miyembro sang NPA ang isa ka ginabulubanta duha ka bulan nga lapsag sa sibilyan antes maghalin sa Hacienda Ambulong.
Posible suno sa leader sang 79th IB nga ang lapsag ang bata ni Alyas Randy bangud sa ila pag-pangusisa sa background sini, bulan sang Nobyembre 2020 sang nagbata ini.Magluwas kay Alyas Randy, may yara man siya sang upod nga ginkilala kay Alyas Monet kag duha ka iban pa nga mga lalaki kun sa diin isa sa ila ang nagapatigayon sang extortion sa lugar.
Nagapakig-angot naman sa karon ang 79th IB sa Talisay CSWDO agud i-turn over ang nasambit nga lapsag samtang yara naman sa kustodiya sang Talisay City Police Station ang mga kagamitan nga na rekober sa lugar nga ginapanag-iyahan sang NPA.
