Nagpain sang pondo ang syudad sang Bacolod agud nga ibulig sa mga nabahaan sa Northern Negros Occidental sang tinalikdan nga Enero 1 kag Enero 8.
Sa interview sang Bombo Radyo kay Vice Mayor El Cid Familiaran, ginpahayag sini nga gin-instructionan siya sang alkalde nga magpreside sa session agud mahambalan ang pagpain sang pondo para sa mga Local Government Units (LGU) nga naapektuhan sang pagbaha.
Nahibaluan nga pila ka mga LGU sa probinsya sang Negros Occidental ang ginpaidalom sa state of calamiy kag ini ang ginlakipan sang syudad sang Talisay, Silay, Victorias kag banwa sang EB Magalona.
Suno kay Familiaran, nagpain ang syudad sang pondo paagi sa Disaster Risk Reduction Management Office (DRRMO) sang syudad sang Bacolod.
May yara sang tag-P1 million nga ihatag nga bulig sa syudad sang Talisay, Silay kag Victorias samtang P500,000 naman ang cash assistance nga ihatag sa banwa sang EB Magalona.
Suno sa bise alkalde, ang cash assistance ipaagi sa cheque.
Suno kay Familiaran, madamo sang pamilya nga naapektuhan sang pagbaha sa probinsya sang Negros Occidental.
Ginpahayag sang bise alkalde nga ang ginhimo sang syudad ang kabahin sang social responsibility.
Nagapati man si Familiaran nga dapat padalman sang Department of Environment and Natural Resources (DENR) ang gintunaan sang pagbaha agud mahatagan sang pagtamod.
