Magapatuman na ang ciudad sang Talisay sang forced evacuation sa tion nga magsugod sa pagsaka ang lebel sang tubig kadungan sang pagtupa sang madamol nga ulan.
Nahibaluan nga nag-eksperyensya sang pagbaha ang Talisay City sang Enero 1 kag 8.
Sa interview sang Bombo Radyo kay Dionela Madrona, pinuno sang Talisay City Social Welfare and Development Office, problema sang mga rescuers sang nagbaha amo ang mga residente nga indi magbakwit bisan nagsaka na ang lebel sang tubig.
Bangud sini, magapatuman na ang city government sang forced evacuation sa mga lugar nga naidentify nga flood prone agud indi na masulit ang kaangay nga problema.
Suno kay Madrona, preparado sila sa evacuation centers sa tion nga may yara sang mga evacuees.
Sa karon, tanan nga mga pamalay nga naapektuhan sang pagbaha ang nahatagan naman sang family food packs apang padayon pa suno kay Madrona ang pagsulod sang mga donasyon nagikan sa pribado nga mga indibidwal kag iban nga LGU kag may direkta man nga ginadul-ong sa mga apektado.
Naghatag man ang city government sang P7, 000 nga financial assistance sa mga pamilya nga totally-damaged ang balay samtang P5, 000 naman sa partially-damaged.
Aminado si Madrona nga ginanerbyos ang mga residente sa tion nga mag-ulan apang nagalaom ini nga nagaaligmat ang tanan.
Nagapanawagan man ini nga manglimpyo sang ugsaran agud indi magbara sa kanal ang basura kag makabulig sa paghagan-hagan sang pagbaha.
