Gin-athag sang Bacolod Police Station 3 nga wala sang iban nga salakyan nga imbolbado sa vehicular accident nga gintunaan sang kamatayon sang isa ka truck driver sa Circumferential Road, Barangay Bata, Bacolod City kagab-i.
Sa interview sang Bombo Radyo Bacolod kay P/Lt. Jessie Lepaña, deputy station commander sang Bacolod Police Station 3, ginpahayag sini nga patabok kuntani sa wala nga bahin sang dalan ang biktima nga si Dindo Layan, 37-anyos kag residente sang Barangay Calumpang, Bacolod City kag sang yara na ini sa center lane, hinali lang nga may nagsirbato sa iya.
Bangud diri, posible nga nagduwa-duwa ini sa pagtabok rason nga nasagaidan ini siya sang Bata-Libertad nga jeep nga ginamaneho ni Felix Vaflor Jr., 45-anyos sang Ara-al, La Carlota City.
Bangud sa mabaskog nga impact, gilayon nga ginbawian sang kabuhi si Layan.
Sa karon yara na sa kustodiya sang Police Station 3 si Vaflor kag ginahulat pa ang desisyon sang pamilya sang biktima kun mapasaka sila sang kaso.
Aminado naman ang driver sang Bata-Libertad nga jeep nga si Felix Vaflor sang Araal, La Carlota City nga nasagairan niya ang biktima.
Suno kay Vaflor, nakita niya nga halin sa natuo nga bahin sang dalan nagikan si Layan kag patabok na sa pihak nga lane apang wala ini nagdirekta tabok bangud may nagpamito nga isa ka salakyan.
Sang nag-atras ang biktima, nalab-ot sang iya jeep ang hawak sini gani siya ang natumba nga nangin kabangdanan sang iya kamatayon.
Apang iya ginpanindugan nga indi madasig ang dalagan sang iya jeep antes natabo ang insidente.
