Apisar gina-abi-abi ni Negros Occdental Governor Eugenio Jose “Bong” Lacson nga duha na ka sunod-sunod nga adlaw nga wala sang may narekord nga COVID-19 case sa probinsya, indi gid dapat nga magpakampante ang tanan bangud posible ini nga magsaka liwat.
Sa interview sang Bombo Radyo Bacolod kay Lacson, ginpahayag sini nga indi gid dapat magpakampante ang tanan ilabi pa subong nga may yara na nga nadetect nga UK variant sa Quezon City.
Suno kay Lacson, dapat gid nga magdoble halong ang tanan bangud madamo sang mga locally stranded individuals nga nagapauli halin sa Manila.
Bangud diri, ila pa gid mas ginapahugot ang protocol para sa mga returning residents agud nga masiguro nga indi makasulod ang bag-o nga variant sang coronavirus sa probinsya.
Samtang, ginkumpirmar man sang gobernador nga magapabilin sa gihapon nga sirado ang border sa tunga sang Negros Occidental kag Negros Oriental.
Suno sa iya, mas mataas gihapon ang active cases sa Negros Oriental kag may mga travelers nagikan sa Cebu nga sarang na makasulod sa amo nga probinsya.
Suno sa gobernador, indi sini luyag nga magdali sa pagbukas sang border bangud mabudlay nga imanage kun nagasulod-gwa ang public transport.
