Nagapati si Atty. Jomax Ortiz nga sa pagpungko ni US President Joe Biden bilang pinuno sang Estados Unidos, makaangkon sang reconciliation ang Amerika kag China kag ang kalibutan ang makaangkon sang kalinong sa masunod nga 50 ka tuig.
Sa interview sang Bombo Radyo kay Ortiz, nagapati ini nga sa masunod nga 50 ka tuig, wala sang may matabo nga risgo sa Third World War bangud ang balantayan lang sa karun sang Amerika amo ang Iran kag North Korea.
Suno sa iya, may treaty ang Estados Unidos sa Iran apang sa pagpungko ni anay US President Donald Trump, wala sini ginhonor ang agreement.
Apisar sini, indi makabig nga threat ang Iran bangud economically, suno sa iya, wala ini sang inugbato sa Amerika.
Ang North Korea naman suno diri ang wala man sang risgo bangud 25 million lang ang ila populasyon kag limitado ang ila mga rockets.
Gindugang man ni Ortiz nga nagcollapse na ang Russia sang 1991 kag isa na lang ini ka Republic sa karun gani mas makusog gihapon ang Estados Unidos.
Suno sa iya, ang China ang nabilin nga giant nga pungsod nga posible makontra sang US apang wala pa sini malab-ot ang teknolohiya nga kaangay sa Amerika.
Apisar sini, makabig ini gihapon nga threat apang nagapati siya nga kun si Biden na ang presidente, magareconcile na ang China kag Amerika kag makaangkon sang kalinong ang kalibutan sa masunod nga 50 ka tuig.
Sa karun, suno kay Ortiz, ang away nga ginapangatubang sa karun sang kalibutan indi ang Third World War kundi ang COVID-19 pandemic.
