Ginkumpirmar ni Bacolod City Lone District Congressman Greg Gasataya nga magasugod na ang pag-ubra sang Department of Public Works and Highways sang tatlo ka mga bypass kag diversion road sa ciudad sang Bacolod.
Sa interview sang Bombo Radyo kay Gasataya, ginpahayag sini nga iya ginpasa ang proposal nga pagatun-an ang paghimo sang bypass kag diversion road sa ciudad sang nagligad nga tuig kag kadungan sang pag-aprubar sang General Appropriations Act, gin-aprubahan man ang nasambit nga proyekto.
Suno sa sa iya, grabe kaayo ang trapiko sa Barangay Sum-ag gani nagpropose ini nga magpahimo sang diversion road agud kun maglab-ot na sa Bacolod proper ang salakyan, maliko nalang ini sa tuo kun sa diin ang dalan ang konektado sa economic highway kag indi na maglab-ot sa Sum-ag proper.
Pagahimuan naman sang bypass road sa Circumferential Road sa Mandalagan area nga konektado sa economic highway.
Ang ikatatlo nga proyekto amo ang isa pa gid ka dalan halin sa Mandalagan padulong sa Granada kag Alangilan.
Suno sa kongresista, nagapasalamat ini sa DPWH sa pag-aprubar sang iya proposal kag ginpahayag nga bypass kag diversion roads ang pagahimuon sang national government sa Bacolod City agud madecongest ang trapiko kag makabukas man ini dugang nga development sa pila ka areas sang ciudad.
Gindugang man ni Gasataya nga pagakay-uhon ang tatlo ka mga merkado sa ciudad nga ginalakipan sang Sum-ag Public Market, Banago Public Market kag Granada Public Market.
Suno sa iya, sang nagligad nga tuig, ginsuguran na ang two storey nga Sum-ag Public Market kadungan man sa pag-ubra sang iya ka Banago kag Granada.
Suno sa kongresista, ini agud madecongest ang sa karun nga mga merkado subong man ng trapiko kag agud mangin accessible ini sa mga nagaistar malapit sa nasambit nga mga lugar.
