Ginmanduan ni Negros Occidental Governor Eugenio Jose “Bong” Lacson si Tourism Officer Jennilyn Cordero nga suguran na ang pagpanglista sang mga kwalipikado nga benepisyaryo sang cash assistance nagikan sa Department of Tourism.
Madumduman nga sang Martes, gin-anunsyar ni Department of Tourism Secretary Bernadette Romulo Puyat nga magabaton sang tag P5,000 nga cash assistance ang mga empleyado nga naapektuhan sang COVID pandemic sa sektor sang turismo.
Ginapahayg sini nga nagpain ang gobyerno sang P3 billion nga pondo para sa mga kwalipikado nga tourism workers nga naapektuhan sang pandemic.
Gindugang man sini nga sarang man nga maka-avail ang mga empleyado nga nakabaton na sang subsidy assistance sa Department of Labor and Employment kag Social Security System.
Sa interview sang Bombo Radyo kay Governor Lacson, ginpahayag sini nga iya ginmanduan si Cordero nga amat-amat na nga maghimo sang listahan kun sin-o sa kapin 2,000 ka mga trabahante sa probinsya nga nadulaan sang trabaho bangud sa pandemic.
Suno sa iya, ginhatagan lang ang probinsya sang tubtob sa Marso agud makumpleto ang listahan gani kinahanglan nga sa karun amat-amat na ini nga masuguran.
Aminado naman ang gobernador nga indi pa handa ang probinsya para sa tourismo bangud may mga travel ban pa nga ginapatuman apang ila na sa karun nga ginaduso ang local tourism kag hugot nga ginapatuman ang mga health protocols.
