Aminado ang hepe sang Talisay City Police Station nga nagnubo na ang kaso sang pagpangawat sa syudad.
Sa interview sang Bombo Radyo kay Police Major Jigger Gimeno, mas ginpahugot pa nila ang pagbantay sa syudad bangud ginpanubuan nila ang curfew hours nga nagaumpisa alas-9:00 sang gab-i kag nagatapos alas-4:00 sang kaagahon.
Suno kay Gimeno, ang sin-o man ang madakpan nga naglapas sa ginapatuman nga curfew hours ang dal-on sa police station agud mahibaluan ang rason nga yara pa ini sa gwa sang ila puluy-an sa oras sang curfew.
Suno diri, may yara sang multa nga P500 sa first offense, P1000 sa second offense kag sa third offense ang pareho multa ang bayaran ukon mahimo mapriso bangud sa paglapas sa pagsulundan batok sa COVID-19.
Ginpahayag man sang hepe nga ang paghugot sa pagpatuman sang curfew hours ang makabulig man panubo sang pagluntad sang krimen sa syudad.
Samtang, ginpahayag man ni Gimeno nga luyag ipaalinton ni Mayor Niel Lizares nga mag-andam sa COVID-19 bangud sa karun nagaamat-amat naman saka ang kaso sang balatian sa syudad.
Nagpanugyan man ini sa mga pumuluyo nga masami magsuksok sang facemask kag sundon ang mga health protocol batok sa COVID-19.
