Ginkumpirmar ni Bacolod City Vice Mayor El Cid Familiaran nga ginpostpone ang deadline sang road clearing operations nga mando sang Department of the Interior and Local Government (DILG) sa Marso 15 nagikan sa orihinal sini nga deadline nga Enero 16, 2021.
Sa interview sang Bombo Radyo kay Familiaran, ginpahayag sini nga wala pa nakaabot ang hardcopy nga igapostpone ang deadline sang nasambit nga mando sa Marso 15 apang kadungan sang pagsinapol ni kaupod ang mga punong barangay nahanungod sa vaccination program, ila na lang ginpabalo ang bag-o nga direktiba.
Suno sa iya, isa sa mga rason sang postponement amo ang doble nga obligasyon sang mga barangay officials bangud sa ginapangatubang nga pandemic kag preparasyon sa vaccination.
Suno sa bise-alkalde, 87% nga compliance na ang Bacolod City sa road clearing operations kag magapadulong sa ciudad ang mga evaluators sa Marso.
Nagapati man ini nga masarangan nga malab-ot ang 100% sa masunod nga duha ka bulan.
Gin-abisuhan man sini ang mga opisyales sang barangay nga kun indi nila masarangan, idocument lang ang mag problema kag ipadala sa city legal.
Suno sa iya, ang mga punong barangay ang mapasa sang accomplishment report sang DILG office kag ang regional office amo ang magapatigayon sang evaluation.
