Patay ang 21 anyos nga lalaki matapos matumba sa bike sa atubang sang computer shop sa Libertad Extension, Barangay 40, Bacolod City kahapon sang hapon.
Sa interview sang Bombo Radyo Bacolod kay Police Executive Master Sergeant Artus Escuadra, senior officer sang Police Station 6, ang biktima ang ginkilala kay Xavier Apostol, residente sang Block 7, Lot 14, Libra St. Sharina Heights Subdivision, Bacolod City.
Santo sa imbestigasyon, nagasakay sa mountain bike ang biktima padulong sa eastwest nga direction sang ini ang natumba kag natup-an ang nakaparada nga motorsiklo nga Honda Click 125, wala sang plate number kag ginapanag-iyahan ni Cherylyn Garcia, 33 anyos kag residente sang Purok Katilingban,Barangay 40.
Gintinguhaan pa sang katapo sang Disaster Risk Reduction Management Office (DRRMO) responders nga irevive ang biktima apang ginbawian man ini sang kabuhi.
Ginkuha naman sang punerarya ang bangkay sang biktima.
Wala pa matumod ang gintunaan sang kamatayon sang biktima bangud ginahulat pa ang request sang pamilya sang biktima para sa autopsy report.
Maathag man sa nakuha nga CCTV footage sa lugar nga wala sang may nakabunggo diri bangud hinali lamang ini nga natumba.
Ginapahayag man nga may ginainom na ang biktima nga maintenance apang wala ini nakahibalo kun para sa diin nga balatian.
Gin-athag man ni Escuadra nga wala nabungguan kag wala man nakabunggo ang biktima.
