Patay ang isa ka 51-anyos nga lalaki matapos nagbato sa operatiba kadungan sa pagserbe sang warrant of arrest sa iya Purok Sta. Rita, Barangay Dulao, Bago City takna alas-10:00 kagab-i.
Ginkilala ang suspetsado kay Emmanuel Sampane, 51-anyos kag residente sang Purok Michelle sa amo nga barangay.
Sa impormasyon nga nakuha sang Bombo Radyo Bacolod, ang operasyon ang ginpangunahan ni P/Capt. Adrian James Albaytar sang AKG Camp Crame sa bulig sang Bago City Police Station.
Si Sampane ang may warrant of arrest sa kaso nga murder nga gin-issue sadtong Agosto 25, 1998.
Ginapahayag nga nagpalagyo ang suspetsado sakay sa iya nga motorsiklo padulong sa katubuhan matapos sini mamutikan ang presenya sang mga operatiba.
Nagpanago ini sa puno sang mahogany kag nag-una palupok sa mga otoridad rason nga nagbalos ang mga ini kag nagresulta sa kamatayon sang suspetsado.
Narecover sa suspetsado ang isa ka colt .45 caliber pistol, isa ka honda beat, isa ka armscor 9mm pistol nga may isa ka magazine kag walo ka live ammunitions, isa ka .38 caliber revolver nga may anom ka live ammunitions kag iban pa nga mga personal nga kagamitan.
