Aminado ang team leader sang Task Force Disiplina sa syudad sang Bacolod nga nangin kampante na ang mga tawo sa syudad sang Bacolod santo sa iya pagobserbar.
Sa interview sang Bombo Radyo Bacolod kay Wilfredo Geolongo, ginpahayag sini nga madamo na sang nagtuluhaw nga mga kapihan kag mga establishimento ilabi ang malapit sa Panaad kag nagapatigayon sang mga banda kag kalabanan ang wala na nagaobserbar sang liquor ban.
Aminado man si Geolongo nga may yara sila sang kabudlayan bangud ang ordinansa nga ginpasar nga ginbalay ni Councilor Archie Baribar nga City Ordinance 966 kag ginisyuhan naman sang alkalde sang Executive Order, nakasaad diri nga ipatuman lamang sang Task Force Disiplina ang health protocols ang proper wearing of facemask, faceshield kag social distancing apang wala man sang penalidad ang mga madakpan.
Suno diri, limitado man ang ila mahimo bangud ginapatuman lamang nila ang nakasaad sa ordinansa gani nagapanawagan sila nga ireview ang ordinansa bangud wala sang nakabutang ang penalidad sa mga madakpan kag pasulit-sulit lamang ang mga violators.
Ginpahayag man sini nga ang mga ilimnan kag kalan-an sa downtown, sa dalan lacson, Mandalagan kag Panaad ang lunsay napangsaway naman sang Task Force apang maayo lang kun ara sila mapati ang mga ini pero kun magtalikod maviolate naman sang ginapatuman nga health protocols.
Dugang pa ni Geolongo nga nareport niya naman ang tanan nga mga naglapas sa ordinansa sa Emergency Operations Center.
Nagpanawagan man ini sa mga estblishmento nga maggamit sang mga disposable nga mga gamit agud nga malikawan ang paglatnanay sang virus.
Suno kay Geolongo, ang ilimnan kag kalan-an sa 9th Lacson St. ang kaduha na nila nadakpan apang paliwat-liwat lamang sila nagalapas sa ordinansa kag nareport niya naman ini sa EOC sa pagpanguna ni City Administrator Em Ang.
