Dakop ang magtiyo sa drug buybust operation ang ginpatigayon sang Bacolod City Police Office (BCPO)- City Drug Enforcement Unit (CDEU) kagab-i sa Barangay 27.
Suno sa Team Leader sang Bacolod CDEU, magtiyo ang una nga nadakpan sa ila nga operasyon sa Lopez-Jaena St., Barangay 27, Bacolod City takna alas-6:30 sang gab-i.
Ang mga suspetsado ang ginkilala kanday Eliezar Montaño alyas Joy-Joy, 37 anyos kag isa ka High Valued Individual (HVI) kag ang hinablos sini nga ginkilala kay Carlo Montaño, 23 anyos kag isa ka Street Level Individual (SLI).
Si Eliezar ang nadakop na anay sa buybust operation sa Bago City, Negros Occidental sang 2017 kag nakagwa ini sang Hunyo 2020 pinaagi sa plea bargaining agreement.
Matapos nga maserbe ang tatlo ka tuig sang sentensya, liwat naman ini nga nadakop kagab-i sa pagbaligya sang iligal nga droga.
Si Eliezar ang subject sa buybust operation apang nakuhaan sang iligal nga droga ang hinablos sini nga si Carlo sa ila mismo nga puluy-an.
Payahag pa sang Team Leader nga nakahaya pa ang bangkay sang amay ni Carlo sa ila nga puluy-an apang ang mga ini amo ang nagduso nga didto gihapon ang transaksyon.
Ginpanindugan pa ni Eleazar nga nadalahig lang ini bangod sa hinablos nakita ang droga.
Ginpatup-an pa sini sang sipa kag pakdol ang hinablos sa pagpanindugan nga ini ang nagdalahig sa iya.
Suno sa team leader, nabudlayan pa ang mga ini sa pagtransaksyon bangod naga-evolve man ang diskarte sang mga nagabaligya kag mabudlay na nga kuhaon ang ila nga pagsalig.
Nakuha sa iya nga paghinakop ang 25 ka gramos sang suspected shabu nga may balor P170,000.
Sa karun, nagapatigayon naman ang mga ini sang follow up operation agud nga makilala ang source nga ginapatihan yara lang man sa nasambit nga Barangay.
Suno sa Team Leader, madasig kun maglapta ang balita sang operasyon sang mga otoridad sa Barangay 27, apang pasalig sini nga matiempuhan gid sang mga ini kag madakop ang source sang iligal nga droga.
