Ginkumpirmar sang administrator sang Philippine Red Cross-Negros Occidental chapter nga magasugod na sa Pebrero 5 ang saliva testing sa ciudad sang Bacolod.
Ini ang kasunod sang pag-aprubar sang national government sa mas barato nga saliva test apang dapat ipatigayon lang ini sa Philippine Red Cross (PRC) molecular laboratory.
Sa interview sang Bombo Radyo Bacolod kay Rita Benita Mirasol, PRC-Negros Occidental chapter administrator, ginpahayag sini nga sa Pebrero 5 ang ila nga target day para sa pagsugod sang saliva testing sa ciudad kun makaabot na ang dugang nga mga equipment kag nakapaidalom sa training ang mga medical technologists.
Suno kay Mirasol, ang saliva testing ang alternatibo sa real-time reverse transcription-polymerase chain reaction (RT-PCR) test.
Dugang pa sini nga ang saliva test ang mas barato bangud nga nagabili lamang ini sang P2,000.
Nagalaom si Mirasol nga mas madamo ang magapa-test bangud nga mas barato ini kun ipaanggid sa P5,000 nga RT-PCR test.
Suno pa sa iya nga mas indi sakit ukon less invasive ang saliva test kun ikumparar sa RT-PCR test nga naga-require sa pagkolekta sang sample gamit ang naso-pharygeal swabs.
Pahayag pa ni Mirasol nga 98.11% accurate ang saliva test sa ginpatigayon nila nga pagtuon.
Nagpanugyan man ini sa mga luyag magpa-saliva test nga dapat wala nakainom sang alcoholic drinks kag dapat nakapanipilyo gid kag matinlo ang baba antes ang testing
