3rd ID, Philippine Army nagpasalamat sa liwat nga pagpasalig sang Presidente nga malakip ang militar kag pulis sa libre nga COVID-19 vaccination program

Nagapasalamat ang tagpamaba sang 3^rd Infantry Division sang Philippine Army sa liwat nga pagpasalig ni Presidente Rodrigo Duterte nga nalakip ang mga pulis kag militar sa una nga pagabakunahan sang vaccine batok sa COVID-19 nga libre kaupod ang ila mga pamilya.

Sa interview sang Bombo Radyo Bacolod kay Army Major Cenon Pancito III, ginpahayag sini nga ‘honored’ gid sila nga uniformed personnel bangud nga ginakilala sila bilang isa ka organisasyon ni Presidente Duterte.

Suno sa iya, mas maayo kun mabakunahan sila sa mas madali nga panahon bangud kabahin sila sa mga frontliners nga may yara sang risky behavior.

Suno kay Pancito, nagalibot kag naga-interact sila sa mga tawo gani nga dako ang risgo nga maglapta ang virus.

Nagapati man ini nga dako nga bulig sa pagpa-untat sang paglapta sang virus ang bakuna.

Apang ginpasalig ni Pancito nga magapadayon sila sa pagtrabaho kag pagserbisyo may yara man sang bakuna ukon wala.

Una na nga ginpahayag sang Malacañang nga yara sang 20 million ka mga Pinoy nga ginalakipan sang mga health workers, mga pigado kag uniformed personnel ang nalakip sa una nga mabakunahan sang COVID vaccine.

Target sang goberno nga makabakal sang kabug-usan nga 148 million doses sang COVID-19 vaccine sini nga tuig nga supisyente para sang 70 million ka mga pumuluyo.