Ginkumpirmar sang gobernador sang Negros Occidental nga ginreswab ang mag-asawa nga nagikan sa United Kingdom kag ginpadala ang ila sample sa Philippine Genome Center kahapon.
Madumduman nga gindeklarar sang mag-asawa ang ila kaugalingon nga Locally Stranded Individuals (LSI) sa baylo nga Returning Overseas Filipinos.
Nagtilaw pa ang mga ini nga magsakay sang Enero 2, 2021 sa eroplano papauli sa Negros Occidental apang ginbalibaran sang airline bangud nagikan ang mga ini sa London.
Sang Enero 16, nagsakay sila sa Air Asia flight apang gindeklarar nila ang kaugalingon nga LSI.
Sa interview sang Bombo Radyo Bacolod kay Governor Eugenio Jose “Bong” Lacson, ginpahayag sini nga ginpabalo siya nga kinahanglan liwaton ang swab test sa mag-asawa bangud ang swab kit nga ginagamit ang para sa mga LSI gani indi ini makadeterminar sang bag-o nga variant rason kun ngaa ginreswab sila kag nagamit sang kit nga para sa mga ROF.
Samtang, magluwas sa mag-asawa, may duha man ka mga persona nga nagikan sa Virgin Island kag Egypt kag nagpauli sa probinsya ang nagpositibo sa virus.
Sila ang ginpaidalum man sa swab test kag ginpadala sa PGC kag ginalauman nga magwa ang resulta sa Miyerkules.
Suno sa gobernador, wala sa karun sang UK variant sa probinsya kag kun may yara sang madetect, kaangay nga mga protocols gihapon ang ipatuman.
