Kampante si Vice Mayor El Cid Familiaran nga magapabilin sa modified general community quarantine (MGCQ) ang Bacolod City sa masunod nga bulan bangud sa manubo nga kaso sa COVID-19 sa ciudad.
Sa interview sang Bombo Radyo kay Familiaran, nagalaom ini nga magpadayon ang kooperasyon sang mga pumuluyo agud mamintinar kag masustain ang manubo nga kaso sa Bacolod.
Ginpakigbahin man sini nga nagpatigayon sang apat ka oras nga pamulong-pulong sang Domingo si Mayor Evelio “Bing” Leonardia kaupod ang mga specialist kag ginpakamaayo nalang sa alkalde kag EOC nga hulaton ang desisyon sang national IATF tuhoy sa pagpanubo sang age restriction sa naga-edad 10 tubtob 14 anyos nga ginpaiway ni Presidente Rodrigo Duterte sang Lunes.
Nagapati ang bise-alkalde nga posible carrier gihapon ang mga kabataan kag bangud makusog ang ila immune system, indi sila makabatyag sang sintomas.
Apang posible nila nga madala ang virus sa panimalay kag malatnan ang mag ginikanan.
Ang mga naga-edad 15 anyos pataas naman suno sa iya ang may mga buot kag paminsaron na kag nakahibalo na sang insakto kag indi.
Nagpanugyan man ini nga sundon na lang ang guidelines bangud nagikan ini sa national government.
