Ginpasalig ni Negros Occidental Governor Eugenio Jose “Bong” Lacson nga handa siya nga mag-istorya sa hog raisers association agud mapasiguro nga may bastante nga suplay sang karne sang baboy sa probinsya.
Sa pagtsekyar sang Bombo Radyo News Team sa Libertad Public Market, nagahamboy karon sa P260 ang presyo sang kada kilo sang karne sang baboy.
Nagapanawagan sa gobernador ang manugbaligya sa Remy Panggo meat shop nga kuntani maghimo ini sang tikang agud nga mapasiguro nga may yara sang bastante nga suplay sang baboy sa probinsya kag kontrolado lang ang ginapadala sa Manila.
Suno sa iya, tag-P170 ang bakal sang Manila sa per kilo live weight sang baboy gani nga nagapasaka man sang presyo sa kada kilo sang buhi nga baboy diri sa lokal.
Nahibaluan nga nagadangat lamang sa P200 tubtob P220 ang presyo sang kada kilo sang karne sang baboy sang una.
Suno naman kay Lacson, handa ini nga istoryahon ang mga hog raisers agud mapasiguro ang suplay sang karne sang baboy sa probinsya.
Apang gin-athag sini nga indi niya mapunggan ang mga hog raisers nga magbaligya sang baboy sa Luzon bangud nga ila ini kinamatarong.
Una na nga ginpahayag ni Provincial Veterinarian Dr. Renante Decena nga nagadangat sa masobra 5,000 nga buhi nga baboy ang napadala sang probinsya sa Luzon halin sang Disyembre 2020 tubtob subong nga bulan sang Enero.
