Pabor si Negros Occidental Governor Eugenio Jose “Bong” Lacson nga himuon duha tubtob tatlo ka adlaw ang eleksyon nga patigayunon sa masunod nga tuig bangud sa COVID-19 pandemic.
Sa interview sang Bombo Radyo kay Lacson, ginpahayag sini nga indi pa man sigurado kun makabalik na sa new normal sa tuig 2022 kag bangud ginalantaw ang health protocols kaangay sang physical distancing, ginaduso sa karun sang national government nga himuon duha ukon tatlo ka adlaw ang eleksyon.
Nagakomporme diri ang gobernador bangud para man ini sa kaluwasan sang tanan batok sa virus.
Naintindihan man sini nga ang tinutuyo sang nasambit nga proposal amu ang maminimize kag malikawan ang paglapta sang virus apang kun sarang na nga makontrol ang pandemic suno sa iya, mas maayo bangud mas mahal sa bahin sang gobyerno kun palawigon ang eleksyon.
