Nagawiit man ang mga bumalakal sang isda kag karne sang manok sa ciudad sang Bacolod bangud kaangay sang karne sang baboy, nagsaka man ang presyo sini.
Sa paglibot sang Bombo news team sa Libertad Public Market kaina sang kaagahon, ang bangrus ang nagabili sang P180 tubtub P200 kada kilo; P140 tubtub P150 ang kada kilo sang tilapia; P180 ang kilo sang marot; P380 tubtub P400 ang kada kilo sang lagaw; P200 ang kilo sang liwit; P200 ang kilo sang bulaw kag P150 tubtub P160 ang kilo sang bilong-bilong.
Suno sa mga fish vendors, diutay ang panguha sang mga mangingisda sa karon ilabi na kun masanag ang bulan gani nagsaka ang presyo sang isda.
Suno kay Nanay Zenia Cardones nga nagaluto sa carinderia, gina-adjust nalang niya ang kadamuon sang serving bangud sa kamahalon sang isda.
Kaangay sang isda, nagmahal man ang presyo sang karne sang manok.
Suno sa mga retailers, nagsaka sa P185 ang kilo sang manok nagikan sa P145 sang bulan sang Disyembre.
Ang presyo naman sang baboy ang nagsaka sa P250 nagikan sa P190.
