Bwas na nga adlaw magasapol ang mga opisyales sang provincial government sang Negros Occidental kag mga miyembro sang Alliance of Hog Raisers Association of Negros Occidental agud hambalan ang tuhoy sa supply sang karne sang baboy sa probinsya.
Ini ang kasunod sang pasalig ni Governor Eugenio Jose Lacson nga istoryahon ang mga hog raisers sa probinsya paagi sa provincial veterinarian nga siguruhon nga may bastante nga supply sa Negros Occidental kadungan sang dako nga demand sa Metro Manila, kasunod sang panawagan sang mga meat vendors sa opisyal.
Sa interview sang Bombo Radyo kay Provincial Veterinarian Dr. Renante Decena, mapatawag sang meeting buas ang gobernador sang probinsya agud nga mapamatian man ang mga problema sang mga hog raisers sa probinsya.
Una naman nga ginpahayag sang gobernador nga handa ini nga istoryahon ang mga hog raisers agud mapasiguro ang suplay sang karne sang baboy sa probinsya.
Apang gin-athag sini nga indi niya mapunggan ang mga hog raisers nga magbaligya sang baboy sa Luzon bangud nga ila ini kinamatarong.
