Gin-athag ni Executive Assistant to the Mayor Ernie Pineda nga makadeklarar lang sang price control sa presyo sang mga baligya sa merkado kun ang isa ka lugar ang napaidalum sa state of calamity, state of emergency ukon civil disorder.
Ini kadungan sang pagtaas sang presyo sang karne, baboy kag manok sa mga merkado sa ciudad sang Bacolod.
Sa interview sang Bombo Radyo kay Pineda, ginpahayag sini nga bangud sa COVID pandemic nga una nga nag-igo sa pungsod sang nagligad nga tuig, ginpaidalum sa lockdown kag mga quarantine restrictions ang mga LGU lakip na ang Bacolod City.
Suno sa iya, sadto nga mga tinion, tuman ka nubo ang presyo sang mga live animals bangud madutay ang demand sang karne, baboy kag manok gani masami nga puno ang outlet kag ginapaubos anay sang mga retailer ang ila baligya antes magbakal liwat.
Bangud diri, nadudla kag nadiscourage na ang mga backyard raisers nga magsagod kag magproduce sang baboy kag ginpadutay ang volume.
Sa karun nga amat-amat na nadula ang restrictions, amat-amat naman nga nagasaka ang demand kag ang supply naman ang madutay.
Bangud diri, nagsaka ang presyo sang mga balaklon ilabi na sang karne, baboy kag manok.
Suno kay Pineda, si Presidente Rodrigo Duterte lang ang sarang nga makadeklarar sang price control kun ipaidalum ang isa ka lugar sa state of calamity, state of emergency ukon civil disorder paagi sa rekomendasyon sang Department of Agriculture nga amu ang implementing agency.
Nagapati ang executive assistant nga sarang masolbar ang pagsaka sang presyo sang karne, baboy kag manok kun madugangan ang supply kag ini ang mangin posible paagi sa pag-import sa iban nga pungsod.
Suno sa iya, kun sa lokal lang kuhaon, makulang gid ang supply apang iya man naintindihan nga indi basta-basta maka-import nagikan sa iban nga pungsod bangud sa pagpamahog sang African Swine Fever.
