P292,000 nga balor sang kwarta ang nakuha sang mga hold-upper nga nagsulod sa isa ka puluy-an sa Purok Carvic, Barangay Mandalagan, Bacolod City.
Takna ala-1:30 kaina sang kaagahun sang nakabatun sang report ang Bacolod Police Station 3 gikan kay Romeo Lobaton, 21 anyos, single nga ginsulod ang ila nga balay sang duha ka mga wala makilal-an nga mga persona nga nagkuha sang ila nga kwarta.
Santo sa imbestigasyon, nagpahayag si Irish Mae Lobaton, 19 anyos, single, nga ala-1:30 sang kaagahun sang ginsulod ang iya nga kwarto sang duha ka wala pa makilal-an nga persona nga nakasuksok sang itom nga bonnet, kag parehas nga nakasuksok sang itom nga jacket, apang isa sa mga ini ang may gina-uyatan nga wala pa matumod nga sahi sang armas-luthang samtang ang isa naman ang nagabantay sa puertahan sang iya nga kwarto.
Santo sa biktima, gintayaan ini sang armas kag ginpamangkot siya kun diin ang kwarta.
Apang sang magsabat ini nga wala siya sang kwarta nga ginapanguyatan, ginpahog naman ini sang suspetsado nga ubuson sila kun indi pag-ihatag ang kwarta.
Bangod sa kahadlok, gindaho naman ni Irish Mae ang cash nga nakasulod sa sling bag nga ginatago sini sa idalum sang iya nga ulunan.
Matapos sini mahatag ang kwarta, gilayon naman nga nagpalagyo ang duha ka suspetsado padulong sa wala pa matumod nga lokasyon.
Aminado naman ang biktima nga bangod sa human sa light materials ang ila nga puluy-an, wala naman sang pagpamilit sa pagsulod bangod nakabukas lang ang ila nga mayor nga puertahan.
