Ginkumpirmar ni Philippine Drug Enforcement Agency Negros Occidental Head Nicholas Gomez nga napasakaan na sang kaso ang suspetsado nga nakuhaan sang kapin P3.4 million nga balor sang suspected shabu sa joint buybust operation sang PDEA kag Philippine National Police sa Purok Riboma, Brgy.Banilad, Dumaguete City, Negros Oriental.
Madumduman nga natigayon nga naaresto si Ronald Japon, 37 anyos, single, high value target kag residente sang Brgy. Mangnao, Dumaguete City, Negros Oriental sang Lunes sang gab-i.
Ang suspetsado ang nagatrabaho nga line man kag driver.
Nakuha sa paghinakop sini ang isa ka sachet sang suspected shabu bilang buybust item, tatlo ka pack sang suspected shabu sa iya possession kag duha ka nahigtan nga plastic nga may unod nga suspected shabu nga nagabug-at sang 500 grams nga may yara sang standard street value of P3, 400, 000.00; P100,000.00 buy-bust money; 1 black sling bag; driver’s license kag motorsiklo.
Sa interview sang Bombo Radyo kay Gomez, ginpahayag sini nga antes ang buybust operations, may naghatag sa ila sang impormasyon nga may maabot nga package nagikan sa Manila.
Suno sa iya, nag-order ang ila asset sang 25 grams nga idagdag kuntani sa Bacolod apang nagdesisyun si Japon nga sa Dumaguete nalang ini himuon.
Ila paman sa karun ginatrace kun upod sa truck ang suspetsado ukon may contact lang ini kag kun may iban pa nga mga imbolbado sa operasyon.
Sa karun yara sa kustodiya sang Dumaguete City Police Station si Japon kag nagapangatubang sa karun sang kaso nga paglapas sa R.A. 9165 ukon Comprehensive Dangerous Drugs Act of 2002.
