Ginalauman nga magasugod sa pag-operate ang ikaduha nga molecular laboratory sang Negros Occidental nga gintukod sang Safeguard Diagnostic Philippines kag provincial government sa Valladolid District Hospital sa ikatatlo nga semana sang Pebrero.
Sa interview sang Bombo Radyo kay Provincial Administrator Atty. Rayfrando Diaz, ginpahayag sini nga ginahulat lang ang license to operate nagikan sa Department of Health kag sa una nga semana sa Pebrero natalana ang proficiency testing kun sa diin target sang probinsya nga makakuha sang 80% accuracy result.
Apisar sini, nagalaom si Diaz nga makakuha sang 100% accuracy result ang nasambit nga molecular lab kaangay sang sa Teresita Lopez Jalandoni Provincial Hospital.
Iya gintawag nga “state of the art” kag isa ka butang nga sarang mapabugal ang bag-o nga molecular laboratory bangud daw robotic ang iya nga style kag mas madasig kag mas accurate ang resulta sini.
Gindugang man sang provincial administrator nga mas mabuhinan ang exposure sang mga medical technologist samtang nagapatigayon sang swab test bangud sa teknolohiya kag mga makinarya nga pagagamiton.
Ila man ginahulat ang saliva analyzer nga sarang makapatigayon sang RT-PCR test paagi sa laway sang isa ka persona.
Mas madamo man nga mga swab samples ang sarang maproseso sang ikaduha nga molecular lab bangud yara sang 4,000 swab samples kada adlaw ang kapasidad sini kun ikumparar sang 1,000 nga mahimo sang TLJPH.
