Naghilibion ang isa ka babayi nga nagasakay sa depampasahero nga jeep nga may ruta nga Bata-Libertad matapos nga gin-agawan sang bag sang isa ka pasahero sa dalan Lizares sa Barangay 39, Bacolod City.
Suno sa report ni anay Bombo Volunteer Chris Jude Sanchez, ang suspect ang nagsakay sa bangga NOHS kag nagpungko malapit sa biktima.
Suno kay Sanchez, mga pito sila tanan nga nagasakay sa jeep kag nakita na sang isa niya ka upod sa ulubrahan nga masami ginatulok sang suspetsado ang bag sang biktima apang indi man mahibaluan nga may malain na ini nga tinutuyo bangud daw kaangay lang sang ordinaryo nga pasahero.
Pag-abot sa bangga nga madulom, nagpapara ini kag sang nagpanaog, ginsabnit niya ang bag.
Ginhambalan man sang biktima ang driver nga balikan bangud gin-agaw ang bag sini apang nakapalagyo na ang suspetsado bangud may nagbantay na nga tricycle bilang get away vehicle sini.
Wala naman sang nagtesting nga magpanaug sa jeep agud lagson ang suspetsado bangud ginapaminsar man sang mga ini ang ila seguridad.
Mataas, mailom, mabukod ang lawas kag nakafacemask apang wala sang faceshield ang suspetsado.
Ang bag sang pasahero ang nagaunod sang wallet, cellphone kag iban pa nga mga personal nga kagamitan kalakip na ang mga ID kag ATM card.
Una na nga gindul-ong sa Bacolod Police Station 6 ang biktima apang ginturn over sa Police Station 1 bangud sa area sini natabo ang insidente.
Samtang, ginpahayag naman sang nakakakita nga isa ka driver man sang depasahe nga motorsiklo nga gilayon man siya nagpanagayo sang bulig sa mga tambay nga mabatian ang pagsinggit sang babayi.
Madamo naman sang mga tambay sa lugar ang nagresponde sang nagsinggit siya nga may ginhold-up.
Suno diri, indi lamang ini ang una nga kahigayunan nga may ginhold up sa lugar bangud sa madulom nga lugar.
Nagapadulong naman sa Singcang-Airport kag Magsaysay ang dalan nga gin-usoy sang mga suspetsado.
