Ginkompirmar sang deputy for medical data and analysis sang Emergency Operations Center-Task Force nga ginaumpisahan na sang Bacolod City Covid-19 Vaccination (CoVac) ang profiling sang pumuluyo sang syudad sang Bacolod nga mga luyag nga magpabakuna sang COVID-19 vaccine.
Sa interview sang Bombo Radyo Bacolod kay Dr. Chris Sorongon, ginpahayag sini nga Bacolod City Covid-19 Vaccination (CoVac) nga ginapangunahan ni Councilor Renecito Novero nga gintukod sang syudad paagi sa Executive Order sang alkalde sang syudad, ang nagkig-angot na sa mga punong barangay sang mga kabarangayan sa syudad agud makaumpisa sa profiling ukon pagpanglista sa mga pumuluyo nga mag-avail sang vaccine.
Gin-athag man ni Sorongon nga ang COVID vaccine ang libre.
Samtang, ginpahayag man sini nga sigurado na ang pagbakal sang syudad sang vaccine sa AstraZeneca.
Suno may yara sang 650,000 doses nga pagabaklon ang syudad nga vaccine kag target nga mabakunahan ang 325,000 ka mga tawo.
Suno kay Sorongon ang tanan nga mga mabakunahan ang nagakinahanglan sang 34-72 ka oras agud obserbahan agud masiguro nga hilway ang mga ini nga natublukan sang bakuna.
Nagpanugyan man sa tanan nga magbakuna na sang COVID-19 vaccine bangud mas kahadlukan ang coronavirus komparar sa COVID vaccine.
Samtang, Gin-anunsyar man ni Dr. Chris Sorongon, nga may yara patigayunon nga dry run sang COVID-19 vaccine.
Suno kay Sorongon, ang pagpatigayon sang vaccination para sa COVID-19 ang pareho lang sa pagbakuna sang mga Polio sa mga kabataan.
Apang ang kinalain lang ang sa COVID vaccine ang mahimo makaavail ang nagaedad sang 18 anyos pasaka kag indi sarang mahatagan ang mga kabataan.
Ginapahayag man sang mga eksperto nga santo sa pagpanalawsaw sa bakuna batok sa COVID-19 ang wala pa makita nga hilway ini nga ibakuna sa mga kabataan.
Ginpahayag man sini nga apisar nga available na ang vaccine kag nabakunahan na ipabilin sa gihapon ang pagsuksok sang facemask kag faceshield sa tion nga maggwa sa tagsa ka panimalay.
Samtang, ginadihon na sa karun sang syudad agud mapatigayon ang online registration sa luyag nga magpabakuna.
