41 ka mga empleyado sang Transcom Bacolod sa Barangay Tangub ang nagpositibo sa COVID-19.
Nahibaluan nga nagsugod ang monitoring sa nasambit nga BPO company sang Enero 23 matapos magpositibo ang isa ka 21 anyos nga lalaki nga empleyado nga residente sang Barangay Bata, Bacolod City.
Ini ang nagasuprer sang hilanat kag ubo.
Matapos ang contact tracing, duha pa ka mga empleyado ang nagpositibo man sa kaangay nga adlaw.
Sang Enero 25 kag Enero 26, nakarekord sang tag-isa ka mga positibo nga kaso; nadugangan ini sang duha sang Enero 27; kag pito naman sang Enero 29.
Bangud diri, nagpatigayon sang surveillance test sa kapin 594 ka mga empleyado sa nasambit nga kumpaniya sang Enero 29 kag 30.
Sa nasambit nga numero, 27 diri ang nagpositibo gani nagdangat sa 41 ang kabug-usan nga numero.
Kagab-i, ginpauntat ang operasyon sang Transcom agud magpatigayon sang disinfection subong nga adlaw.
Gina-alegar nga wala nagascan sang BACTRAC ID ang kumpaniya kag ginakabig ini nga breach of protocol.
Suno kay City Administrator Em Ang, nagapadayon pa sa karun ang ila nga contact tracing.
