Kadungan sang pagsinapol sa mga provincial officials, nagpresentar sang mga alternatibo ang presidente sang hog raisers association agud nga masabat ni Provincial Governor Eugenio Jose “Bong” Lacson ang kinahanglanun sang mga hog raisers sa probinsya.
Suno kay Provincial Veterinarian Dr. Renante Decena, isa sa ginapangatubang nga problema sang probinsya amo ang nagasaka nga presyo sang feeds.
Bangod sa kamahal sang feeds, pila sa mga nagasagod sang baboy ang nagabaligya na sang mga hinuptan apisar nga wala pa nagdangat sa nagakaigo nga kabug-aton.
Samtang suno kay Decena, nagpasalig ang mga hog raisers nga may baboy pa nga sarang maihaw sa probinsya kag indi matam-an ang mga taga-Negros sa mataas nga presyo.
Kadungan man sa ginalantaw nga solusyon ang restocking.
Nahibaluan nga sadtong 2015 nagnubo na ang populasyon sang baboy apang sang 2020, kapin 3.2% naman ang pagnubo sa populasyon sang mga nayon ukon kapin 15,000.
Nagpaathag naman si Lacson nga naghatag sang P5 million nga ayuda ang probinsya kag igaprocess nalang sang mga ini ang mga dokyumento.
Samtang ang Provincial Veterinary Office naman ang nagakonsiderar sang proposal nga pagbakal sang dugang nga breeders.
Ini ang pangayo sang mga hog raisers agud mas mangin madasig ang pagbusong sang nayon kasubong man ang pagdugang sang mga baktin.
Dugang pa ini sa isa ka libo nga mga baktin nga ginhatag na sang tinalikdan nga tuig.
Suno kay Decena, nahatagan sang dako nga bulig kag paglaom ang industriya sang mga manugbaboy.
