Nagpatuman sang 24-hour lockdown subong nga adlaw sa Transcom Bacolod sa Barangay Tangub, Bacolod City agud magpatigayon sang disinfection matapos nga nagpositibo sa COVID-19 ang 41 ka mga empleyado.
Nahibaluan nga nagsugod ang monitoring sa nasambit nga BPO company sang Enero 23 matapos magpositibo ang isa ka 21 anyos nga lalaki nga empleyado nga residente sang Barangay Bata, Bacolod City.
Ini ang nagasuprer sang hilanat kag ubo.
Matapos ang contact tracing, duha pa ka mga empleyado ang nagpositibo man sa kaangay nga adlaw.
Sang Enero 25 kag Enero 26, nakarekord sang tag-isa ka mga positibo nga kaso; nadugangan ini sang duha sang Enero 27; kag pito naman sang Enero 29.
Bangud diri, nagpatigayon sang surveillance test sa kapin 594 ka mga empleyado sa nasambit nga kompaniya sang Enero 29 kag 30.
Sa nasambit nga numero, 27 diri ang nagpositibo gani nagdangat sa 41 ang kabug-usan nga numero.
Sa interview sang Bombo Radyo Bacolod kay Councilor Renecito Novero, ginpahayag sini nga may isa ka empleyado nga nagduty pagkatapos sang surveillance testing imbes nga magpaidalom ini sa home quarantine gani nga naglapta pa gid ang transmission sang virus.
Gin-athag man sang konsehal nga sa 41 ka mga nagpositibo, 33 lang diri ang taga-Bacolod samtang ang walo naman ang taga-probinsya.
Dugang pa sang konsehal nga may yara sila sang kabudlayan sa pag-contact trace bangud nga wala nagagamit sang Bactrac system ang amo nga BPO company apang may yara man ini sang manuan logbook.
Suno kay Novero, mas mapadali kuntani ang contact tracing kun may yara sang Bactrac.
Suno naman kay Barangay Kagawad Ray Pendon sang Barangay Tangub, nagsugod sila bantay sa mga vicinity sang amo nga kompaniya halin kagab-i.
Wala nila anay ginapahanugutan nga makasulod sa opisina ang mga empleyado bangud sa ginapatigayon nga disinfection.
Ginkumpirmar man ni Pendon nga sa 41 ka mga nagpositibo sa amo nga BPO company, tatlo diri ang taga-Barangay Tangub.
Gilayon naman nga ginsealed-off ang mga balay sang mga nagpositibo.
Nagapanugyan ini sa publiko nga magsunod gid sa health protocols bangud yara pa sa gihapon ang virus.
