Padayon pa nga ginapangita ang isa ka mangingisda nga namissing sa baybayon sang Barangay Miranda banwa sang Pontevedra nagligad nga Enero 29.
Sa interview sang Bombo Radyo Bacolod kay Commander Ludovico Librilla, pinuno sang Coast Guard Station-Negros Occidental, ginpahayag sini nga takna alas-6:00 sang aga sadtong Enero sang nagpanagat sanday Reynold Catalan, 26-anyos kag residente sang Purok Lampirong, Barangay Miranda, Pontevedra kag Teodoro Castellano, 39-anyos sang Purok 2, Barangay Burgos sa amo gihapon nga banwa.
Samtang nagabutong sang fishnet ang duha, aksidente nga nahulog sa dagat ang container sang ila ilimnon nga tubig.
Naglumpat sa dagat si Castellano agud kuntani kuhaon ang container.
Bangud sa mabaskog nga balod, nabudlayan ini nga magbalik sa ila nga bangka.
Gintinguhaan pa ini nga buligan ni Catalan kun sa diin iya ginhigot ang fishnet sa ila nga bangka agud nga irescue si Castellano.
Apang napalos ang fishnet sa bangka rason nga amat-amat nga gina-anod ang ila nga sakayang pandagat.
Bangud diri, ginhaboy ni Catalan ang empty container kay Catalan kag nagbalik ini sa ila nga bangka agud nga indi maanod.
Apang pagkatapos sini, indi na niya makita ang biktima.
Matapos ang pila ka oras nga pagpangita sa area, nagdesisyon si Catalan nga magbalik sa shoreline sang Barangay Miranda kag ginreport ang insidente.
Sa karon suno kay Librilla, padayon pa ang search and rescue operation sang PCG-Hinigaran kaupod ang Bantay Dagat Hinigaran.
